Ակադեմիայի կամուրջ (իտալ.՝ Ponte dell'Accademia), Վենետիկի Մեծ ջրանցքի չորս կամուրջներից մեկն է: Անվանվել է Վենետիկի գեղարվեստի ակադեմիայի պատվին: Ակադեմիան 1907-2004 թվականներին Վենետիկի Ակադեմիայի պատկերասրահի հետ միասին տեղակայված են եղել «Scuola della Carità» շենքում, որտեղ էլ այժմ գտնվում է ակադեմիայի պատկերասրահը: Կամուրջն Ակադեմիայի պատկերասրահը միացնում է Սան Մարկո շրջանի հետ:
Կամուրջը նախատեսվել է կառուցել դեռևս 1488 թվականին: Քաղաքային խորհրդում պրովեդիտոր Լուկա Տրումն առաջարկել է Մեծ կանալի վրա կառուցել երկու կամուրջ, մեկը՝ նշված վայրում, մյուսը՝ Սանտա Սոֆիայում: Նրա առաջարկը ծիծաղ է առաջացրել խորհրդի անդամների մոտ, և հարցը քվերակության չի դրվել: Ալֆրեդ Վևիլի նախագծով ստեղծված պողպատե կոնստրուկցիայով կամուրջը բացվել է 1854 թվականի նոյեմբերի 20-ին, սակայն քանդվել է և փոխարինվել Էուժենիո Միոցցիի նախագծով ստեղծված փայտե կամուրջով, որը բացվել է 1933 թվականին:
Երկրորդ կամուրջը, գտնվելով վատ վիճակում, 1985 թվականին փոխարինվել է ներկայիս կամուրջով: 2011 թվականին առաջ է քաշվել կամուրջը փոխարինելու հարցը:
Սիրահարները «սիրային կողպեքներ» են ամրացնում կամրջի մետաղական ձողերի վրա, սակայն Վենետիկի իշխանությունները միջոցներ են ձեռնարկում դրա դեմ: