«Բագրատիոն» կամուրջ (ռուս.՝ Мост «Багратио́н»), առևտրա-հետիոտնային կամուրջ Մոսկվայում՝ Մոսկվա գետի վրա՝ «Մոսկվա Սիթի» համալիրի կազմում: Բացվել է 1997 թվականին: Կամուրջը կապում է Կրասնոպրեսնենսկայա ափը Տարաս Շևչենկո ափին:
Կամրջի բացումը տեղի է ունեցել 1997 թվականի սեպտեմբերին` Մոսկվայի 850-ամյակի կապակցությամբ: Կամուրջը կառուցվել է ճարտարապետ Բորիս Տխորի և կոնստրուկտոր Վլադիմիր Տրաուշի նախագծով: Կամուրջն անվանվել է 1812 թվականի հայրենական պատերազմի Արևմտյան 2-րդ բանակի գլխավոր հրամանատար Պյոտր Բագրատիոնի պատվին:
2004 թվականին կամուրջը քաղաքի կողմից փոխանցվել է «Միոսոր» ընկերությանը հավատարմագրային կառավարման, որի ղեկավարման ներքո է գտնվում նաև «Աշտարակ 2000» շենքը: Նույն թվականի հոկտեմբերին «Բագրատիոն» առևտրի կենտրոնի նախասրահում Կրասնոպրեսնենսկայա ափում տեղի է ունեցել Էռնստ Նեիզվեստնու «Կյանքի ծառը» քանդակային կոմպոզիցիայի բացումը:
2008 թվականին «Օրանտա ապահովագրական ընկերությունը» կամուրջն ապահովագրել է 300 միլիոն ռուբլի ապահովագրական պարտավորության սահմանաչափով: 2016 թվականի հունվարի 21-ից շինության ապահովադիր մարմինը «Ռոսգոսստրախ» ընկերությունն է: Ապահովագրության պայմանագրի արժեքը կազմել է 771,4 հազար ռուբլի:
Կամուրջը գտնվում է Կրասնոպրեսնենսկայա առափնյա փողոց 16 հասցեում: Կրասնոպրեսնենսկայա ափի կողմից կամրջի նախամուտքը կապված է «Վիստավոչնայա» մետրոյի կայարանի հետ, մյուս ափում կամուրջը հատվում է «Աշտարակ 2000»-ի հետ:
Կամուրջի մոտ՝ Կրասնոպրեսնենսկայա ափին, տեղակայված են «Բագրատիոն կամուրջ» և «Միջազգային ցուցահանդես» կառանատեղերը: Կամրջի տակ՝ Տարաս Շևչենկո ափում է տեղակայված «Տարաս Շևչենկո նավահանգիստ» կառանատեղը: «Բագրատիոն կամուրջ» և «Տարաս Շևչենկո նավահանգիստ» կառանատեղերում նավերն օգտագործվում են վարձակալության սկզբունքով: «Միջազգային ցուցահանդես» կառանատեղն օգտագործվում է տարբեր երթուղիների համար գործող նավերի կողմից և այս կառանատեղից կարող եք քայլել նավի վրա: