Բարեհուսո հրվանդան (աֆրիկ․՝ Kaap die Goeie Hoop, հոլ.՝ Kaap de Goede Hoop, պորտ.՝ Cabo da Boa Esperança, անգլ.՝ Cape of Good Hope), հրվանդան Աֆրիկայի հարավում՝ Հարավաֆրիկյան Հանրապետությունում, հարավային լայնության 34°21′32″֊ի և արևելյան երկայնության 18°28′21″֊ի տակ։
1488 թվականին պորտուգալացի ծովագնաց Բարդուղիմեոս Դիաշը Հնդկաստան ուղևորվելիս հայտնագործեց հրվանդանը և այն կոչեց Փոթորիկների հրվանդան (պորտ.՝ Cabo das Tormentas)։ Այստեղ հանդիպում են Ատլանտյան և Հնդկական օվկիանոսների փոթորիկները։ Սակայն Պորտուգալիայի թագավոր Ժուան II֊ը չհաստատեց դաժան և վախեցնող անվանումը և հրվանդանը վերանվանեց Բարեհուսո՝ նկատի ունենալով այստեղից երազած Հնդկաստան հասնելու հույսը։