Մայնցի տաճար (գերմ.՝ Mainzer Dom, լրիվ անվանումը` Der hohe Dom zu Mainz) կամ Սուրբ Մարտին Տուրցու և սուրբ Ստեփանի տաճար, եպիսկոպոսական տաճար Գերմանիայի Մայնց քաղաքում, կայսերական տաճարներից է (գերմ.՝ Kaiserdom): Ճարտարապետական տեսանկյունից այն սյուներով եռանավ բազիլիկ է: Տաճարը կառուցված է ռոմանական ոճով, բայց պարունակում է նաև գոթիկայի ու բարոկկոյի տարրեր:
Տաճարի շինարարությունը հավանաբար սկսվել է 10-րդ դարի վերջին: Հետագա երկու դարերում ավարտին են հասցվել տարբեր մասերի կառուցումները, իրականացվել են վերանորոգումներ, վերականգնվել են մասամբ վնասված մասերը: Միջնադարում տաճարում թագադրվել են մի շարք արքաներ: 1184 թվականին Ֆրիդրիխ I Շիկամորուսի որդիները տաճարում ասպետներ են կարգվել: Այդ արարողությունը պատմության մեջ մտել է որպես միջնադարի նմանատիպ խոշորագույն իրադարձություն: