Մորելիա (իսպ.՝ Morelia), քաղաք և համայնք Միչոական նահանգի հյուսիս-կենտրոնական մասում, կենտրոնական Մեքսիկայում։
Քաղաքը գտնվում է Հուայանգարեո հովտում և համարվում է նահանգի ամենամեծ քաղաքը և մայրաքաղաքը։ Այստեղ նախաիսպանական շրջանի մշակույթի մաս են կազմել պուրեպեչանները և մատլացինկաները, սակայն այդ ժամանակաշրջանում ոչ մի խոշոր քաղաք չի հիմնադրվել։ Իսպանացիներն այս տարածքն սկսել են վերահսկել 1520-ական թվականներին։ 1541 թվականին փոխարքա Անտոնիո դե Մենդոսայի գլխավորությամբ իսպանացիներն այստեղ հիմնում են Վալադոլիդ անվանումով բնակավայր, որը դառնում է մոտակա Պացկուարո քաղաքի մրցակիցը։ 1580 թվականին Վալադոլիդը դառնում է գաղութային շրջանի մայրաքաղաքը։ Մեքսիկայի անկախության պատերազմից հետո քաղաքն անվանվում է Մորելիա՝ ի պատիվ Խոսե Մարիա Մորելոսի։
1991 թվականին քաղաքը ընդգրկվել է ՅՈւՆԵՍԿՕ-ի համաշխարհային ժառանգության ցանկում լավ պահպանված գաղութային ժամանակաշրջանի կառույցների և պատմական կենտրոնի համար։