Սայդնայա (արաբ․՝ صيدنايا), քաղաք Սիրիայի Արաբական Հանրապետության հարավում՝ Ռիֆ Դիմաշկի մարզում։ Ալ-Թելլի գավառի համանուն շրջանի վարչական կենտրոնն է։ Բնակչությունը կազմում է 5 194 մարդ
Սայդնայան գտնվում է Սիրիայի մայրաքաղաք Դամասկոսից 27 կմ հյուսիս։ Մաալուլայի հետ համարվում է քրիստոնեական ուխտագնացության երկրորդ կենտրոնը՝ Երուսաղեմից հետո։ Կլիման լեռնային է, բնակչությունը քաղաքից զբաղվում է այգեգործությամբ, երկրագործությամբ ու անասնապահությամբ. քաղաքում գրեթե չկան ծառեր։ Զարգացած է սննդի արդյունաբերությունը և սպասարկող ոլորտը։
Սայդնայայում մարդիկ բնակվել են մ.թ.ա. 6-րդ դարում՝ արամեացիների տիրապետության ժամանակ։ Քաղաքը հայտնի էր որպես Դանաբա։ Այստեղ մինչև հիմա ապրում են արամեացիներ, ովքեր խոսում են իրենց մայրենի լեզվով։
Ավանդության համաձայն, բյուզանդական կայսր Հուստինիանոս Ա-ին (527-565) այստեղ այծյամի տեսքով երևացել է սուրբ կույս Մարիամ Աստվածածինը, և այստեղ վանական համալիր կառուցելու խնդրանքով է դիմել։ Կայսեր քրոջ հրամանով սկսում են շինարարական աշխատանքները։ Տաճարում պահվում է սուրբ առաքյալ Ղուկասի նկարած սրբապատկերը։ Ըստ ավանդության՝ դա Մարիամ Աստվածածնի պատկերն է։ Վերջինս փակված է մետաղյա շերտով, և այն արգելվում է տեսնել։
Տեղի մուսուլմաններն ու քրիստոնյաները դարեր շարունակ սեպտեմբերի 8-ին նշում են Աստվածամոր տոնը։ Նրանք գալիս են այստեղ՝ իրենց հիվանդությունները բուժելու նպատակով։
2000 մ բարձրության վրա գտնվում է Քերովբեների վանքը, որտեղից տեսարան է բացվում դեպի մայրաքաղաք Դամասկոս, նրա արվարձաններ, ինչպես նաև՝ Անդրլիբանանյան լեռներ։ Մինչև Քերովբեների վանքն ընկած ճանապարհին գտնվում է Մար Թոմա (արաբ․՝ مار توما` սուրբ Թովմաս) վանքը։
Սայդնայայում է գտնվում քրիստոնեության հիմնադիր Հիսուս Քրիստոսի մետաղյա արձանը:
եկեղեցի Սայդանայում | հիվանդանոց Սայդնայայում | Աստվածամոր տաճար |