Տոկիոյի համալսարան (ճապ.՝ 東大) հնագույն և խոշորագույն համալսարան Ճապոնիայում։ Հիմնադրվել է 1877 թվականին՝ որպես Տոկիոյի ազգային (կայսերական) համալսարան։ Ունի իրավաբանական, տնտեսագիտական, բանասիրական, մանկավարժական, ինժեներա-տեխնոլոգիական, բնական գիտությունների, գյուղատնտեսական, բժշկական, դեղագործական ֆակուլտետներ, ինչպես նաև հանրակրթական քոլեջներ։ Համալսարանին կից գործում են տիեզերական ճառագայթների լաբորատորիա, երկրաշարժերի, միջուկային հետազոտությունների, ֆիզիկական պինդ մարմինների, կիրառական մանրէաբանության, արդյունաբերության, ժուռնալիստիկայի, բժշկական գիտությունների (1892), արևելագիտության, սոցիալական գիտությունների, տիեզերքի և օդագնացության, օվկիանոսագիտության և այլ գիտահետազոտական ինստիտուտներ։ Գրադարանը (հիմնադրվել է 1877 թվականին) ունի 4 միլիոն և ավել գիրք։