Վալերի Չկալովի հուշարձան (ռուս.՝ Памятник Валерию Чкалову), Նիժնի Նովգորոդի տեսարժան վայրերից մեկը: Գտնվում է Նիժնի Նովգորոդի Կրեմլի Սուրբ Գեորգիի աշտարակի մոտ, կառուցվել է խորհրդային օդաչու Վալերի Չկալովի պատվին, որը Հյուսիսային բևեռով անվայրէջք թռիչք է կատարել ԽՍՀՄ-ից ԱՄՆ (Մոսկվա-Հյուսիսային բևեռ-Վանկուվեր): Հուշարձանից դեպի Վոլգա գետ սանդուղք է իջնում, որը հայտնի է որպես «Չկալովի աստիճաններ»:
Վալերի Չկալովի ժամանակակից հուշարձանի տեղում 17-րդ դարի սկզբին հիմնադրվել է Պրոիսխոժդենսկի կանանց վանական համալիրը, որն այժմ կոչվում է Կրիստովոզդվիժենսկի և ներկայիս վայր է տեղափոխվել 1815 թվականին` Լյադովի հրապարակի մոտ: Վանքի ավերված կառույցները պահպանվել են մինչև 1840 թվականը, երբ Կրեմլի հարակից տարածքներում բոլոր շենքերը քանդվում էին և պատերի շրջակայքում ստեղծվում հանգստի գոտիներ, զբոսայգիներ:
Լեգենդար օդաչուի հուշարձանը բացվել է 1940 թվականի դեկտեմբերի 15-ին, նրա մահվան երկրորդ տարելիցի օրը: Հուշարձանի հեղինակն է Չկալովի ընկերը՝ Իսահակ Մենդելևիչը, որոնց հետ միասին նրանք այս տեղն ընտրել էին Մաքսիմ Գորկու հուշարձանի համար: Այս աշխատանքի համար Մենդելևիչը պարգևատրվել է Ստալինյան մրցանակով: Հուշարձանի ճարտարապետներն են Իվան Տարանովը և Վիկտոր Անդրեևը:
Հուշարձանի պատվանդանի մակերեսին ուրվագծված է Հյուսիսային կիսագնդի քարտեզը հերոսական անձնակազմի չվերթով՝ Չկալով-Բայդուկով-Բելյակով՝ դեպի Հեռավոր Արևելք և Հյուսիսային բևեռից դեպի Ամերիկա: Պատվանդանը երեսապատված է լաբրադորիտով:
Պատվանդանին գրված են օդաչուի ծննդյան և մահվան ամսաթվերը՝ «Վալերի Չկալովին, մեր ժամանակի մեծ օդաչուին» մակագրությամբ:
