ՑԵՌՆ (ֆր.՝ CERN), միջուկային հետազոտությունների եվրոպական կազմակերպություն, աշխարհի բարձր հոսանքների ֆիզիկայի խոշորագույն լաբորատորիան է։ Թարգմանվում է «Միջուկային հետազոտությունների եվրոպական կենտրոն»։ CERN հապավումը առաջացել է ֆր.՝ Conseil Européen pour la Recherche Nucléaire («Միջուկային հետազոտությունների եվրոպական խորհուրդ») անունից։
ՑԵՌՆ–ը գտնվում է Ժնևի մերձակայքում Ֆրանսիայի և Շվեյցարիայի սահմանի վրա։ ՑԵՌՆ– տարածքը կազմված է երկու հիմնական մեծ և բազմաթիվ այլ՝ փոքր հարթակներից։ Մեծ համալիրը ընդգրկում է աշխատանքային առանձնասենյակներ, լաբորատորիաներ, արտադրական տարածքներ, պահեստներ, համաժողովների դահլիճներ, բնակելի տարածքներ, ճաշարաններ։ Արագացուցիչների համալիրը գտնվում է ինչպես երկրի վրա, այնպես էլ գետնի տակ՝ 100 մետր խորության վրա (առավել ժամանակակիցները՝ SPS, LHC)։
Հիմնական հարթակն է շվեյցարական Մեյրին (ֆր.՝ Meyrin) քաղաքի կից տարածքը, կոչվում է ֆր.՝ site Meyrin։ Մյուս հիմնական՝ ֆր.՝ site Prévessin կոչվող հարթակը գտնվում է ֆրանսիական Պրևեսան–Մոեմ (ֆր.՝ Prévessin-Moëns) քաղաքին կից։ Առավել փոքր հարթակները ցրված են LEP արագացուցիչի համար կառուցված ստորգետնյա օղակի շուրջը։